အယိုင် အနွဲ့ဆိုတာ
အပျော့ အမာ သဘော
သူက တင်းရင် ကိုယ်က လျော့
ကိုယ့်ဘက်က လျော့ပေး အဲ့ဒီလို ဆို
ကျိုးပဲ့ခြင်း ပရိပက္ခတွေ မရှိတော့ဘူး
လေယူရာ ယိမ်းတဲ့ အုန်းပင်တွေ အနေချောင်တယ်
ထန်းပင်တွေက မာကျောတော့ ကျိုးပဲ့ကုန်တာပေါ့
မုန်တိုင်းတွေ ထန်ပေမယ့်
ထန်းပင်တွေ မျိုးတော့ မတုန်းပါဘူး
ကျိုးပဲ့တတ်တဲ့ သဘောကိုပဲ ပြောတာပါ
တစ်ခါတလေ ကိုယ်ဘက်က ယိုင်ပေးတာလဲ
ကိုယ် လဲကျမသွားပါဘူး
ကိုယ့် မာနဆိုတာ အမြဲတမ်း တိုက်ချွတ်ထားရမယ့်
အရာမှ မဟုတ်တာ မာနတွေ တပြောင်ပြောင်ဆိုရင်
အကျည်းတန်နေပါလိမ့်မယ်။
ကျွန်တော့်ကို အထင်သေးပါစေ
အပြစ်ပြောပါစေ၊ လွတ်လပ်စွာ အမြင်မကြည်လင်ပါစေ ကျွန်တော် ယိုင်ပေးပါ့မယ် ယိုင်တယ်ဆိုတာ ကြမ်းတမ်းစွာ တန်ပြန် ပြုမှုပြောဆိုတာမျိုးကို မလုပ်တာကို ပြောတာပါ။
ကိုယ်ဝါသနာပါရာ ကိုယ်စားဝတ်နေရေးအလုပ်တွေ ကိုယ့်ရဲ့လုပ်ရည်ကိုင်ရည်တွေ အမြဲတိုးတက်နေဖို့ ကြိုးစားနရတဲ့ အတွက် ကျွန်တော့်မှာ မာနကို တိုက်ချွတ် ဆေးကြော ဖို့
အချိန်မရှိ လက်ခမောင်းခတ် စိန်ခေါ်ဖို့ အချိန်မရှိပါဘူး။
ကျွန်တော့်ရဲ့ အဖိုးတန်အချိန်တွေ ထိခိုက်သွားမှာ စိုးလို့ ခဏ ခဏ မကြာမကြာ ယိုင်ပေးပါ့မယ်။
ကျွန်တော်က ပြန်လည် ရန်တွေ့ဖို့ထက် ကိုယ့်အရည်အသွေးကိုယ်တိုးတက်ဖို့ ပဲ ကြိုးစားရမယ်။
ကိုယ့်ကိုယ်ကို ယုံကြည်တဲ့သူဟာ
တပါးသူကို မတိုက်ခိုက်တတ်ပါဘူး။
ဆောင်းတစ်ရာမင်း
4.8.2021
No comments:
Post a Comment